2009.2.7.  星期六

今日正月十三，祝大家新年進步！萬事如意！

原本計劃去聖地，但果邊局勢不穩，暫時都係咪去住。其實我已經報左名，仲交左訂，但報名人數不足退回訂金。可能要到出年過年先可以去。

年初六我同 daddy 和 sara去了北京四天遊。

可能我喜歡睇舊野，我覺得好好玩，好值得去。天氣無想像中冷，食住都很享受。這次之後令我更想到中國其他地方旅行，下一站最想去黃山。其中一個原因是希望襯有力氣可以行，否則年紀再大就未必行得郁。

去到北京同仁堂，睇左個中醫教綬，替我一家三口把個脈。講得又好似幾 0岩 wor，感覺佢幾有料，於是乎聽佢講，結果買左大堆藥，夠我地嘆半年。仲俾團友笑「你地第一次去旅行呀？」。哈哈！老字號，應該唔會呃人卦，至多買貴左 d 者，但有料既中醫可遇不可求，無所謂啦！

公司初八已開工，但我初九先回港，跟住老細又去左旅行未返；所以這星期公司好靜，所有打電話黎 d 客，都話等星期一老細返工先過黎。難得清靜，其實我有好多功課未做。

今日亞姿打俾我，話換水時打爛左 aushan 個花樽，覺得好唔好意思。其實真係無所謂，果度咁大風，我都預左會容易打爛。我柜仔裏面仲有花樽，下星期我去時會放出黎，暫時大家去探 aushan，就唔好買花住 la。因為需然無花，佢仲有棵聖誕樹嘛，去到幫佢棵樹仔加下水就得 la。

11月20日   星期四

無寫日記兩個多月，社會經濟急速變壞，金融海嘯席捲全球。唔好話唔關你事，身邊總有些朋友被裁員，有些公司被銀行收緊借貸 cut 額，以致公司難以運作要結束。而我….兩類朋友都有。希望大家可以積極面對，共渡時艱。

可以處理的，求主賜大家決心去處理改善；不能改變的，求神給大家信心去接納；不能達成的渴想，求主給我們釋然的心放下。

我公司生意暫時慢左落黎，因為做買賣唔同做工廠，我地可以停，但工廠就唔停得。現時希望收得齊 d 街數，等過年。但….一 d 都唔樂觀，因為仲要 d 客頂得住唔好執先得。照理由應該人乜野做，應該唔會太辛苦，但剛剛相反，因為追數真係好難，同埋老細無野做，成日睇實晒，唔係話辛苦…係覺得好煩。但都感恩，因為仲有得做。

教會事亦忙得好緊要，因為要進行改革，好多會要開。加上又要上堂，對上個星期，門訓堂有兩 part 由我帶，搞到我鬼咁緊張，要花好多時間去備課。真係批評人，好容易，到自己做既時候先知唔簡單。但確實教、學相長，從中得著很多，希望自己可以習慣 d，唔使咁大壓力。

幫我公司裝修既勝哥，我請佢幫我整下廚房，執下漏。原本我想廚房整好 d ，換晒無逢石。但我上手業主換水喉時，做晒明喉，d位無法改。又唔係唔改得，但一改就要好貴，於是淨係換左d 雲石、洗碗盆、同埋d柜門。基本上新既一樣，但形格無變過。

最近兩次探 aushan，走既時候總係等唔到車，已經連續兩次徒步落山。行 20 分鐘，都唔算太辛苦，依加天氣清涼，仲幾舒服添。果度有位大叔，佢話好多時都見到我，有時佢會同 aushan d 花加水咁話，真係唔該晒。

上個月細豪通知我 JC 過左身。佢係 aushan 個老細，aushan 幫佢泳會教水。試過 aushan 話參加佢泳會 d 節目，去到好夜返屋企，我同佢通過 2 次電話。記得 aushan 出事果日，我因為唔太識 aushan d 朋友，所以打電話俾佢。佢同我講佢當 aushan 係契女，仲即刻陪我去出事地點。後尾，完晒安息禮拜，佢話會約我食飯，叫我一定要出黎。真係世事難料，我唔知佢因乜事過身，但希望佢屋企人節哀。

9月4日    星期四

9月1日聖經學院感恩會。原來不經不覺間已經讀左兩年，仲得埋勤力獎添。哈哈！
新一季的兩科，其中一科上左，另外一科是選修科，我的選修學分已夠分，所以會暫停一季。
跟住三個月唔使上堂，除了門訓助教，希望可以抽多些時間栽培初信的姊妹。
確實對於各弟兄姊妹的靈命成長停滯不前，真的很心急，特別係我屋企果兩劇。但又不能強迫，唯有不斷為他們祈禱。

講開門訓，上星期開左獻心會。正如牧師自己講，他沒有太多教導的恩賜。他太仁慈、太體諒大家。我自己覺得壓力就是動力，如果樣樣事客客氣氣，可做可不做，學員個個鬆鬆散散，未開始就諗定幾時要請假，真是有 d 擔心。見到牧師咁隱悔既提醒，真係想話不如等我講，但我爭住出聲又好似無分莊閒咁，所以….都真係….有 d 憫！

我個姪孫 8月19日已經出世 la。上星期去探佢，叫極都唔醒，做爛訓豬。 Wings 話唔使驚，就夠鐘食奶，佢會準過鬧鐘。果然一夠鐘就放大個喉嚨喊，俾枝奶佢，食兩啖又喊下，如是者食下、喊下，食一餐奶要成個幾鐘。唔知係咪太耐無接觸 bb，見到咁喊法，真係暈暈地。

有個朋友，個老公要同佢離婚，通過法援處申請，寄左份法庭呈請書俾佢。收左 d 文件要佢 7 天內填回，佢搵我幫手睇下要點覆。一大疊，部份有中文譯本。但法律既野，隻隻字都識，就係唔知點解。唯有叫佢去搵法援，但法援處 d人，問一句答一句，敝在唔識法律既人，連自己想問乜都唔知。請左一日假出去，問左一大輪，仍然唔知點辦。唉！法律真係不是窮人的玩意。唯有出動朋友、朋友個朋友，去請教一 d 律師朋友。好在自己無呢 d  fd，但總有些朋友有呢 d  fd。識玩法律既朋友，佢話呢 d 遊戲好 easy  0者，但我地就煩餐死。

 八月十五中秋節，我老細個舊  partner ( 亦即我地其中一個舊老細 ) 取新抱。老細落左命令話，我地個個都要去。其實阿宏份人好低調，可能根本就唔想大搞，揀 8月15 就係唔想請咁多人。但我老細就話要請邊個、邊個，連e+ 無做 d 舊同事都要請。講真丫，咁既日子，我同 ceci 都唔想去，但無計。

我老細真係好得意，佢好鍾意幫人出意見，訂菜、試菜，訂酒席又要自來魚、自來鮑魚。尋日返黎好開心咁話：
我買左 d 窩麻鮑，間鋪頭幫我發埋只係收 50 蚊一斤人工。擺酒用原隻鮑魚都係 60幾蚊隻，你話我醒唔醒呢？所以生意人，至叻就係用最低成本，得到最高果效勒。都唔係我自己認香呀！

係既！係既！  唔係咁…都唔知可以點回應佢。

我公司有個客牛哥，係做夜冷既。好多 claim 完保險賣返出黎既，都係俾佢買左。佢收到水漬紗就一定係賣俾我地。近來佢話有水漬燕窩賣，事源上環海味鋪水浸，保險賠完賣出黎，只係 2500 蚊一斤。話係水漬，其實只係濕左少少，我老細即刻話要十斤。聽講話好似仲有水漬冬蟲草 tim，屋企個個肺氣弱，買返少少都好。等我諗諗先！
今日又話有間珠寶店賠完火險，又有野賣。牛哥真係好犀利，簡直是通天經紀，上至高科技產品，下至日常家品，乜都識得賣。真係行行出狀元！

8月16日   星期六

計劃緊農曆年往聖地旅遊。Daddy 已經 say no，唔知邊個有興趣陪我去呢？年初二起程14天。

奧運會開幕禮俾人話做假，正、反意見都有。我就覺得一個表演項目，賞心悅目，已經達到目的。將最美的視覺與最美的聽覺放在一起，俾大家享受又有乜所謂呢。應該話有把靚聲既小朋友，佢唔係唔靚，係因為有個更靚的選擇，可以令整個表演更賞心悅目。以前 d 戲劇都有幕後代唱喇，只係想個表演完美 0者，我認為無傷大雅。

Ceci 個女去美國讀書，我送她一個小禮物，鼓 lee、鼓 lee。放工時在地鐵站見到佢，佢跳住咁走埋黎，搭住我膊頭多謝我。我即時的感覺，她簡直就是 aushan 的翻版；鬼鬼馬馬、無大無細。但係，我鍾意！

老板娘好得意，佢叫我地叫佢屋企個菲傭，黎公司做下清潔喎，費事佢個工人嚮屋企坐咁話。但係，果個明明係你工人，又點會你唔叫佢，叫我地叫呢？同埋我又點知你個工人幾時得閒呢？奇怪！

我姪女 Wings 同兩位有左 bb 既姊妹，預產期都係 8 月尾，其中有位姊妹已經搶閘，生左個 b 女。 Wings 話佢每天胎教，幫 bb 講，唔使心急，等埋佢 daddy 返先出世。因為莫生係亞視體育組工作，e +去左北京，佢要等奧運會閉幕先可以返黎。

今個星期日，教會大掃除。每年暑假，教會都會總動員，一齊做清清潔。

最近有兩個消防員旬職，令我想起我的消防員朋友。
阿 Sam、阿 Low、阿榮，還有你們所有的同事，你們要萬事小心。我已將你們的平安，放入我每天的禱告記念中。

8月5日  星期二

 原本 7月31日去新疆，按行程  8月 4日剛好在喀什。尋日一早返工老細就話我地好彩無去，原來喀什發生暴亂。就算自己無事，都嚇親香港 d 屋企人，都係咪去住好 d，或者 9月先去啦。

星期日，鄉下個表弟一家 5 口自由行。由廣州出發，直去香港海洋公園。表弟星期六打電話黎話，星期日去完海洋公園就黎我度。心諗第一次黎香港，我住屯門咁遠，點識黎丫，唯有出金鐘接佢地。好彩我屋企個廳夠大，無房訓都起碼可以訓廳。
佢地都好好野，做晒資料搜集，第一次黎，完全唔使我操心，早出晚歸。我帶過佢地一次返屯門，第二日已經識自由往返。去完狄士尼，仲識得去埋尖沙咀星光大道睇夜景，跟住搭車返屯門。真係服左佢地。
今日晏晝，俾個電話問下佢地去左邊喇，點知佢地已經到左澳門 la 喎。
其實都有 d 唔好意思，因為大家都要返工，無人可以陪到佢地。

 屋企 2 隻狗仔，可能大個左，識得0累人，又識扭計。因為怕佢成日吠，sara 好陰公呀，送左個頸圈俾佢地，一吠呢…就電到佢地慘叫，sara 話電過幾次佢地就唔敢再吠 la wor。又可能因為俾人電，所以狗仔要抗議，近排幾乎日日都上 sara 張床尿尿。睇見佢咁，真係又好嬲、又好笑。做媽媽…係咁架 la，唔係你估教仔咁容易呀！ Haha..！

見到一個憤怒青年，突然變得溫柔順服，原來談戀愛了。哈哈！好想話俾 aushan 知。

我原本租既樓，因為業主話要收返黎賣，我 e+ 買左 la。起碼唔使再搬屋。

教會歐傳道要去美國進修一年，明天就起程了。

第二期門訓，9月開課，答應左做助教。

繼續為大姑丈一家禱告，求神親自安慰和帶領！